Darna, naghahanap ng dating nag-Darna para sa finale episode

GORGY RULA

Hindi pa rin pala natatapos ang taping ng finale episode ng Mars Ravelo’s Darna.

Ang narinig ng PEP Troika, nagkaproblema sila sa schedule dahil may mga natanggap na palang ibang commitments ang bida ritong si Jane de Leon.

Ayon sa manager ni Jane na si Tyrone Escalante, matagal nang naka-block ang taping at wala silang tinanggap na raket sa mga araw na yun. Na-extend lang daw nang na-extend ang Darna.

Kaya lang, may mga natanggap na silang ilang raket na hindi nila puwedeng ibigay sa Darna dahil matagal nang naka-commit iyon.

Kagaya noong Miyerkules, Enero 18, 2023, matagal nang naimbitahan si Jane sa fiesta ng Bansud, Oriental Mindoro. Kasama nga si Yeng Constantino para magpasaya sa fiesta roon. Sa pagkakaalam namin, naghahanap pa sila ng aktres na nakapag-Darna na noon at magiging bahagi sana sa finale ng seryeng ito ng Kapamilya Channel. Wala pa yata silang nakuha.

PHOTO: ABS-CBN

Kahit si Paolo Gumabao, na may malaki ring role sa Darna, ay hindi na pumuwede sa taping ng finale episode dahil matagal na siyang naka-oo sa Borracho Films para sa pelikulang Spring in Prague. Pebrero 7 sila lilipad patungong Prague para mag-shoot doon.

Read: Paolo Gumabao, sasabak sa rom-com movie; graduate na sa hubaran?

“They had to find the way to work with my character, kasi pumasok na ako dito, e,” pakli ni Paolo sa nakaraang story conference ng Spring in Prague ng Borracho Films.

“They have to do something with my character… kasi ang plano lang talaga ng Darna, December 20 tapos na ang taping.

“But siyempre hindi natin maiwasan may mga delay. Minsan kasi may ulan, hindi makapag-taping nadi-delay. So, na-extend na hanggang January. “E, itong pelikulang ito, nakakasa na po sa akin ito ng mga October pa lang. So, I had to you know siyempre, to follow the commitment dito sa pelikula na ito,” dagdag niyang pahayag. Malaki ang pasasalamat ni Paolo sa ABS-CBN dahil ipinagkatiwala sa kanya ang isang malaking role sa Darna.

“Happy naman talaga ako sa Darna kasi ang dami ko ring natutunan. Napakalaking tulong ng Darna sa akin, kaya gusto rin magpasalamat sa ABS-CBN siyempre at sa JRB Creative Production na nabigyan nila ng ako ng pagkakataon na napatunayan ang sarili ko sa TV, sa mas malaking role sa teleserye,” saad ni Paolo.

NOEL FERRER

Nakakalungkot ang pangyayaring ito sa Mars Ravelo’s Darna.

Of course, everyone wants the best for the show. Pero parang hindi lang pinagtiyap ng tadhana lahat.

Sayang, kasi pumayag na ang Asia’s Songbird na si Regine Velasquez at nagbigay na ng schedule, cancelling some other commitments after hingan siya ng pabor ng kanyang network.

All set na at nasukatan na siya’t lahat, the thing is, hindi lang talaga puwede ang bida. Isang malaking SAYANG!!!

Kung puwede lang nga si Iza Calzado na bumalik… mahal na mahal siya ng production team nito at tutulungan niya ang mga ito, pero hindi na talaga kaya ng kanyang sitwasyon lalo pa’t kabuwanan na niya.

Sino pa kaya ang makakatulong sa sitwasyon ni Darna? Si Nanette Medved? Ayaw nang umarte talaga. Angel Locsin? Sharon Cuneta? Busy sila sa buhay nila. Paano kaya kung si Vice Ganda? Kung matuloy kaya si Vice, ano kaya ang sasabihin niya kay Darna?

JERRY OLEA

Napapanood na ang Bahasa Indonesian-dubbed version ng Mars Ravelo’s Darna sa free TV network na ANTV ng Indonesia.

Sa pagtatapos ng pilot week nito, maganda ang pagtanggap ng Indonesian viewers sa kwento ni Narda (Jane de Leon) at mas napabilib sa kanyang unang transformation bilang Darna. Ibinahagi ng ANTV chief program and communications officer na si Kiki Zulkarnain ang kanilang galak na dalhin sa Indonesia ang kuwento ni Darna. Aniya, "We have always presented programs with a narrative closely associated with the daily lives of Indonesian people. “As we begin the year, we present a new genre to our viewers that tell the story of the iconic Filipino heroine Darna, which also appeals to our younger audiences as she serves as a perfect role model for them. “Darna certainly makes our programming more diverse, and we hope it will not only entertain but instill values in the youth through her acts of kindness and bravery."

Maganda at kapuri-puri ang first two weeks ng Darna na idinirek ni Chito S. Roño. Kita mong pinagkagastusan at pinaghandaan nang husto.

Read: Chito Roño fulfills childhood dream to direct Darna: "I got excited like a kid again."

Interesting malaman ang reaksiyon ng Indonesian viewers sa special effects ng fantaserye kapag nagtagal-tagal na ito.

Kumpara sa special effects ng Avatar: The Way of Water ay napapailing na lang tayo sa mga paandar lately ng Darna.

Nananabik tuloy lalo tayo na matunghayan ang Voltes V: Legacy, na akala natin before ay makakasalpukan ng Darna sa ere.

Siyempre, hindi na tayo magugulat sa kahihitnan ni Noah, ang karakter ni Paolo Gumabao sa Darna, considering na naka-focus na ito ngayon sa bagong pelikula na Spring in Prague katambal ang Macedonian actress na si Sara Sandeva.

Sa recent presscon ng Spring in Prague, inamin ni Paolo na hindi pa sila nagkikita o nagkakausap ng nakakulong na amang si Dennis Roldan mula nang lumaganap ang COVID-19 pandemic.

“Pero may mga kunyari, sina Marco [Gumabao], or mga ibang kapatid ko, pag nakakabisita sila… ‘Uy, pinapasabi ni Papa na congrats daw!’ So, may mga ganun.

“Siyempre, may TV din sila dun sa bilibid at nakikita niya rin, napapanood niya rin, inaabangan niya rin yung Darna na nakaka-touch siyempre.

“Pinapanood niya raw kasama ang ibang inmates, ganyan. So happy. Happy. Happy rin siya and he’s proud and I’m also very proud to be representing siyempre our family sa industriya na ito,” sambit ni Paolo.